Il fogolarismo udinese si presenta a Buenos Aires

Il cordialissimo presidente Eduardo Dino Baschera della "Sociedad Friulana" ovvero "fogolâr furlan" di Buenos Aires, il più antico fuori d'Italia, ha invitato il coordinatore fogolarista udinese prof. Alberto Travain a scrivere una nota per il bollettino sociale "E dîs la None" in occasione della Festa del Friuli del 3 aprile 2023. Detto fatto. Ecco il testo "in marilenghe" pubblicato sul periodico friulano d'Oltremare. Un'occasione proficua per stabilire maggiori rapporti d'interscambio tra realtà libere e pulsanti della Friulanità in patria e nel mondo.

«Il dean Baschera mi à domandât juste ben di scrivi pai 3 di Avrîl, Fieste dal Friûl, une note in cont dal Fogolâr Civic, robe di Udin, e po mi à scrit che i plasarès ancje un resonament su la Joibe Grasse, il ribalton furlan dal 1511. Si che, inalore, par contentâlu tant in chest che in chel, o scrivarai ce che al jentre chel Fogolâr Civic cun chê Joibe Grasse e un tant cu la fieste de Furlanie. Il Fogolâr Civic – moviment civist culturâl furlan tal troi di Aquilee, capitâl primarole de Mittel-Europe, batiât cun chel non tal 2002 ma instradât za tal 1989 cuntune trasmission par radio e tal '91 vignût indevant cuntun parlament sociâl dal Friûl, par impastanâ tal '94 ancje propit un circul universitari – al à simpri vude chê di doprâ la culture e soredut la storie par tirâ sù il Citadin di vuê, di mût che no si lassi meti sot i pîts e che al pretindi vôs in cjapitul su lis decisions sul so cjâf cence mai sei sotan in dut e pardut dai siei sorestants. Ve ce che al lee, cussì, Fogolâr Civic ancje al ricuart di chê Joibe Grasse, riviel di popul cuintri de antighe autonomie furlane doprade mâl o ben cuintri de int e dal sintiment. Autonomie furlane chê vignude indevant di chei 3 di Avrîl 1077, cuant si à creât un Stât dal Imperi roman-todesc sot dai Patriarcjis chei di Aquilee, po metûts in rie de siorie dal Friûl, che e faseve alt e bas, di ogni jerbe un fas, e lis leçs a so pro tal famôs Parlament che i disevin de Patrie ma al jere il ridot dai siorats de regjon. Rivade Vignesie al puest dai Patriarcjis, chê siorie, inalore, si à cjatât scunide però e je lade indevant istès a tibiâ lis biadis popolazions. E in chê volte Udin al jere la cove di chei ribaltons cuintri dai siorats che a sparonsonavin pe Furlanie: capitâl di popul, indulà che il popul al comandave ancjemò dai timps dal Patriarcje Beltram cu la preminence de fameone dai Savorgnans chei di Cuelmalîs, che di chei al jere Antoni, che al veve chê di ribaltâ ducj i nobii e restâ nome lui al comant dal Friûl cul favôr de int basse, rivoluzion no mai lade in puart in chel sens ma riessude sul pont di sveâ il gjalinâr e creâ un cuintriparlament, la Contadinance, tribuns de plebe tant che a Rome antighe, primizie te storie de democrazie in Europe. La grande buriane di chê Joibe Grasse e vignive propit dal fat che la int e bramave contâ in chel Friûl politic vignût indevant dal timp dai Patriarcjis, indulà che invezit no contave nuie: sôl paiâ tassis e dî "comandi". Ancje Fogolâr Civic al à cirût di butâ chê semence, o di rif o di raf, in chescj agns culì, cuintri prepotentis sioriis paesanotis o citadinis, massime politichis, che a plasiment ben a àn fat e a fasin il biel o il brut su la barbe di chei che no àn fuarce di nie: votâ ogni cinc agns e po zito là! Che chel al è il biel: diferent di une volte i sorestants vuê si ju vote ma une volte votâts a son parons espotics no miôr di chei antîcs. La menade pal boro de democrazie presint! Ma la int – tante int – un tant no capìs o no vûl capî. E je là che si sbroche a ribaltâ lis scuelis par parâ i fîs principins plens di borie e capriçs insegnâts in cjase o biâts fruts fastiliâts che no àn plui fameis seris e no pretint però di contâ là che i vons vignûts prins di lôr a pretindevin di just di contâ ven a stâi su guvier e maneç dal Public: su la politiche! E su la politiche, passâts trente agns e ancje un toc, si à butât, cumò, chel Fogolâr Civic, che no si stracapissin no plui i clârs intents siei civîi e sociâi simpri stâts però facii a confondisi tal mignestron de culture, de Storie, dal passetimp. Al è nassût, aduncje, Fogolâr Politic, che bielzà tal non al è dut un program. E culì mi fermi, che chê note achì e varès saltâ fûr juste ai 3 di Aviiil, che in Furlanie chest an ca si vote e no fâs reclam. Fogolâr Politic però no si candide: trente agns su lis spalis ma inmò frut di scune par fevelâ di za listis sôs. Ancje i simbui a fevelin e lein une volte cun ce che al devente. E il garoful di part "çambarlane", chê dal ribalton dal 1511, al è za di agnorum emblem popolâr dal Fogolâr Civic. Cumò la sclese nere savorgnane – chê de steme di Udin, capitâl ribaltone – e il tei verdulin des democraziis di paîs di une volte o ben des viciniis a dan i colôrs di Fogolâr Politic… Une pinelade ca, alore, in cont di une atualitât no sclave de Storie e di nostalgjiis e pûr cun lidrîs ben plantadis insot. E se i à volude la Joibe Grasse – che Diu nus vuardi des copariis! – par modernizâ plui in favôr di popul il Friûl chel vieri dai Patriarcjis, sperìn che no i vueli une altre compagne par sveâ i furlans, messedot di vuê, a pretindi riformis che a puartin la int a contâ di plui sul so teritori. Al sarà dificil: tancj massepassûts che si infotin di dut e cetancj biadaçs che a stan dongje dai grancj sôl par podê molziju. Si à tornât, tal 2015, a implantâ il Renc a Udin, la assemblee di popul dal Beât Beltram, là che i citadins, diferent di cumò, a vevin dirit di vôs in cjapitul su dutis lis robis e di decidi... No stin a sburtâ par cori a cjapâ puest!».